میراتگرانی فیردەوس
بەروار: 2015/04/03سەردارن: 1307نوسەر: إدريس محمود

بِسْمِ اللهِ الرحمنِ الرحيم
الحَمْدُللهِ وَحْدَهُ، وَالصلاةُ وَالسلامُ على مَنْ لا نبي بَعْدَهُ :
میراتگرانی فیردەوس
بۆ ئەوانەی تامەزرۆی بەهەشتن
بۆ ئەوانەی پەرۆشن بۆ بەدەستهێنانی ڕەزامەندی هەمیشەیی خوا سبحانه
بۆ ئەوانەی تامەزرۆی گەیشتنن بە دیداری الله -جل جلاله –
خوای گەورە لە سەرەتای سورەتی ( المؤمنون )دا باسی چەند شتێكی بۆ كردووین كە بە گوێڕایەڵیكردنی خوا سبحانە تیایاندا دەبیت بە یەكێك لەو كەسانەی بە هەمیشەیی لە بەهەشتی فیردەوسدا دەمێننەوە، ئەمەی لای خوارەوەش پوختەی ڕاڤەی ئەو ئایەتانەیە :
1 " الَّذِينَ هُمْ فِي صَلَاتِهِمْ خَاشِعُونَ " .
ئەوانەی كە لە نوێژەكانیاندا دڵا ئارام و ملكەچ و دامەزراون و خشوعیان هەیە .
خشوع و ملكەچیش لە نوێژدا بەوە دەبێت كە دڵت بە ئاگا بێت و ترس و خۆشەویستی پەروەردگارت لە دڵدا بێت بەمەش دڵت ئارام دەبێت و جووڵەی ئەندامەكانی لاشەت كەم دەبێتەوە .
ئەوەش بزانە كە خشوع ڕووحی نوێژە و بە پێی كەم و زۆری خشوعەكەت پاداشتەكەشت كەم و زیاد دەكات .
2 . " وَالَّذِينَ هُمْ عَنِ اللَّغْوِ مُعْرِضُونَ " .
وە ئەوانەی لە قسەی بێسوود دوورەپەرێزن واتە : خۆیان دوور دەخەنەوە لەو قسانەی كە چاك نیە یان چاكەی لێناكەوێتەوە و خۆیان بەو قسانەوە خەریك ناكەن .
جا با ئەوانەی شەو و ڕۆژ بە قسەی پووچ و نوكتە و قسەی ناشرین بەسەردەبەن لە خوابترسن و واز لەو وتانە بهێنن پێش ئەوەی ڕۆژێك بێت كە پەشیمان بوونەوە سوودی نیە .
3 . " وَالَّذِينَ هُمْ لِلزَّكَاةِ فَاعِلُونَ " .
وە ئەوانەی زەكاتی ماڵەكانیان دەدەن و بەو زەكات دەركردنە پاكی دەكەنەوە لەو پیسیەی تێكەڵی بووە، وە ئەوانەشی كە دڵ و دەروونی خۆیان لە خراپە و تاوان پاك دەكەنەوە .
4 . " وَالَّذِينَ هُمْ لِفُرُوجِهِمْ حَافِظُونَ * إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ * فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ " .
وە ئەوانەی كە داوێنی خۆیان دەپارێزن جگە لە هاوسەر و كەنیزەكەكانیان كە ئەوە جێگەی لۆمە و سەرزەنشت نیە، جا ئەوەی جگە لەو سنورە دیاریكراوە ڕێگەی تر بگرێتەبەر ئەوا بە لەسنور دەرچوو دەژمێردرێت .
ئەوانەی كە خەریكی زینا و خووی نهێنی و ژنهێنانی كاتی ( موتعە )ن بە لەسنوور دەرچوو دەژمێردرێن و تاوانبارن .
5 . " وَالَّذِينَ هُمْ لِأَمَانَاتِهِمْ وَعَهْدِهِمْ رَاعُونَ " .
وە ئەوانەی كە چاودێری ئەمانەت و پەیمانەكانیان دەكەن واتە : هەر ئەمانەتێكیان پێ‌ بسپێردرێت ئەوا بە جوانی جێ بە جێی دەكەن، ئەم ئەمانەتە شتە دینیەكان و دونیاییەكانیش دەگرێتەوە، وە ئەگەر پەیمانیش بە كەسێك یان كۆمەڵێك بدەن غەدر ناكەن بەڵكو بە جوانی دەیبەنە سەر و فێڵ ناكەن و نایشكێنن .
6 . " وَالَّذِينَ هُمْ عَلَى صَلَوَاتِهِمْ يُحَافِظُونَ " .
وە ئەوانەشی كە پابەندن بە نوێژەكانیانەوە و لە كاتی خۆیدا ئەنجامی دەدەن و دەیپارێزن .
جا ئەوەی ئەو سیفەتانەی تێدا بێت كە لەسەرەوە باسمان كرد ئەوا گەورەترین موژدەی پێدراوە لە لایەن خواوە سبحانە كە فەرموویەتی :
" أُولَئِكَ هُمُ الْوَارِثُونَ * الَّذِينَ يَرِثُونَ الْفِرْدَوْسَ هُمْ فِيهَا خَالِدُونَ " .
ئا ئەوانە میراتگرن میراتگری فیردەوسن و بە هەمیشەیی تیایدا دەمێننەوە .
جا با هەموومان هەوڵ بدەین لە خاوەنی ئەو سیفەتە جوانە بەرزانە بین كە لە دونیادا دەتكات بە كەسی چاك و بە سوود بۆ خۆت و كۆمەڵگاكەت وە لە دواڕۆژیشدا دەتخاتە فیردەوسەوە بە ویستی خوا سبحانە .
پێغەمبەری خوا صلى الله عليه وسلم فەرموویەتی :((الجنة مئة درجة ... وإن أعلاها الفردوس وإن أوسطها الفردوس وإن العرش على الفردوس)) ( صحيح / صحيح سنن ابن ماجه : 3496 ) . واتە : بەهەشت سەد پلەیە ... بەرزەكەی فیردەوسە و ناوەڕاستەكەشی فیردەوسە و عەرشیش لە سەرووی فیردەوسەوەیە .
خوا سبحانە بە فیردەوس شادمان بكات ... آمين .
وَصَلى اللهُ عَلَى مُحَمدٍ وَعَلَى آلِ مُحَمد