ماڵپەری بەهەشت

بەشە سەرەکیەکان
پرسیار و وەڵامی شەرعی
ئاماری ماڵپەڕ




ڕێکلام
ڕوونكردنەوەیەك سەبارەت بە تەقینەوە و خۆتەقاندنەوە و ئاكام و شوێنەوارە خراپەكانی لە ناو كۆمەڵگادا

بە پێویستی دەزانین حوكمی (تەقینەوە و خۆتەقاندنەوە / التفجیرات و الانتحارات) بۆ موسوڵمانانی كورد زمان ڕوون بكەینەوە لە ڕوانگەی شەریعەتی پیرۆزی ئیسلامەوە بەوەی فەتوای (دەستەی گەورە زانایان / هيئة‌ كبار العلماء) سەبارەت بەم كارە دڕندانە و تێكدەرانە وەرگێڕین بۆ سەر زمانی كوردی: بۆ ئەوەی چی تر چەمكی تێگەیشتنەكان تێكەڵ نەكرێن و كاری دڕندانە و ناڕەوای گەندەڵكار و سەگە هارەكانی ناو ئاگری دۆزەخ (كلاب أهل النار) لە سەر ئیسلام و موسوڵمانان حیساب نەكرێت …
[* برِیاری (دەستەی گەورە زانایان)]
(كۆنگرەی دەستەی گەورە زانایان دوای تێڕوانین و لێكۆڵینەوە و ووردبوونەوە: بە كۆڕا لە سەر ئەمانەی خوارەوە بڕیارى دا:
یەكەم: ئەم جۆرە تەقینەوەیە كردارێكی ستەم كارانەیە و حەرامە به پێی شەریعەتى ئیسلامى پیرۆز و بە كۆ ڕاى هەموو موسڵمانان، ئەوەش لەبەر ئەم هۆكارانەی خوارەوە:
1 ـ ئەم تەقینەوەیە دەست درێژی كردنە بۆ سەر ئەو شتانەی كە بەڵگە نەویستن ئیسلامی پیرۆز قەدەغەی كردوون، وەك: دەست درێژی كردنە سەر ئەو كەسانەی كە ئیسلام خوێن ڕشتنیانی حەرام كردووە، یان ئەو دارایانەی كە ئیسلامی پیرۆز لەناودانی قەدەغە كردوون، لە گەڵ تێكدان و شڵەژاندنى ئەمن و ئاسایشى خەڵكانى دامەزراو لە ژینگە و شوێنى بژێویان و لە هاتن و چوونیاندا بە ئارامى و ئاسایشەوە، وە لە بەر دەستدرێژى كردنە سەر بەرژەوەندیە گشتى یەكان كە خەڵك تواناى دەست لێ هەڵگرتنیانى نى یە لە ژیانى ڕۆژانەیاندا.
چەند ناشیاو و گەورەیە تاوانی ئەو كەسەی كە سەركەشانە ڕێ بە خۆی دەدات سنورەكانی خوای پەروەردگار بشكێنێت و ستەم لە بەندەكانی بكات، و موسوڵمانان و ئەوانەش كە لە نێوانیاندا دەژین بتۆقێنێت، وەیل بۆ حاڵی ئەو كەسە وەیل بۆ حاڵی چی دەربازی دەكات لە سزای پەروەردگار و توڕە بوونی، وە لە پاڕانەوەی ستەم لێكراوێك كە بیگرێتەوە، داواكارین لە خوای پەروەردگار پەردە لە سەر كاری هەڵماڵێت و حەیاشی بەرێت …
3 ـ ئەم كردەوە ستەمكارانە چەندین شتی حەرام و قەدەغەكراو دەگرێتە خۆ كە لە ئیسلامدا زانراو و بەڵگە نەویستن وەك: غەدر و خیانەت و ستەم و دەست درێژی و تاوان و تۆقاندنی موسوڵمانان و جگە لەوانەش، وە هەموو ئەمانەش ناشیاو و خراپەكارین خوای پەروەردگار بە توندترین شێوە قەدەغەی كردوون و ڕقی لێـیانە و پێغەمبەرەكەشی صلى الله عليه وسلم و موسوڵمانانیش بە هەمان شێوە.
وە ئەوەش بە هەموو جیهان ڕادەگەیەنێت كە: ئایینى ئیسلامى پیرۆز بێ بەریە لەم كردەوەیە (واتە: تەقینەوە)، وە بە هەمان شێوە هەموو موسڵمانێك كە بڕواى بە خواى پەروەردگار و بە ڕۆژى دوایى هەبێ بێ بەریە لێی …)(1).
[* برِیارێكی تری (دەستەی گەورە زانایان) (هيئة كبار العلماء):]
(… ئەوەتان پێ ڕادەگەیەنین كە كۆنگرەى (دەستەى گەورە زانایان) … ئەوەى تاو توێ كردووە كە لە زۆر لە وڵاتانى ئیسلامى و ـ جگە لەوانیش ـ ڕوودەدات لە:
بە كافر(تەكفیر)كردنى خەڵكانى موسوڵمان و ئەو تەقینەوانەى كە ڕودەدات (2)و ئەوەش كە بەهۆیانەوە دێتە كایەوە لە خوێن ڕشتن و وێرانكردنى دام و دەزگاكان.
جا لە بەر ترسناكی ئەم كارە، و ئەو ئاكامانەى لەسەرى بنیات دەنرێ: لە كوشتنى خەڵكانێكى بێ تاوان، و لەناودانى سامان و دارایى كەسانێك كە سامان و داراییان پارێزراوە بەپێی شەریعەتى ئیسلامى پیرۆز، لە گەڵ تۆقاندنى خەڵك، و بشێوى ئەمن و شڵەژاندنى ئاسایشیان (3):
كۆنگرە وا دەبینێت كە بەیان نامەیەك بڵاو بكاتەوە تێیدا حوكمى ئەو كردارانە ڕوون بكاتەوە... بە پشتیوانى خواى پەروەردگار دەڵێین: …
كۆنگرە لە كاتێكدا ئەوە ڕوون دەكاتەوە كە حوكمى تەكفیر كردنى خەڵك بەبێ بەڵگە لە قورئانى پیرۆز و سوننەتەكانى پێغەمبەرى خواوە (صلى الله عليه وسلم)، لە گەڵ ترسناكى بەربڵاوكردنى ئەم حوكم دانە، لە بەر ئەو خراپە كاریانەى كە لە سەرى بنیات دەنرێ ئەوە بە هەموو جیهان ڕادەگەیەنێت كە: ئایینى ئیسلامى پیرۆز بێ بەریە لەو بیر و باوەڕە هەڵەیە، و ئەوەش كە لە هەندێك لە وڵاتانى ئیسلامدا ڕوو دەدات لە ڕشتنى خوێنى بێ تاوانان، و تەقاندنەوەى ماڵ، و ئۆتۆمبیلەكان، و دەزگا ــ گشتى و تایبەتەكان ــ و ڕووخاندنى دامەزراوەكان كردارێكى تاوان كارانەیە و هیچ پەیوەندیەكى بە ئیسلامەوە نى یە.
بەهەمان شێوە هەموو موسڵمانێك كە بڕواى بە خواى پەروەردگار و بە ڕۆژى دوایى هەبێ بێ بەریە لێى بەڵكو ئەو كردارانە كردارى كەسێكە كە هەڵگرى بیرێكى لار و بیروباوەرێكى گومڕاكارانەیە، بۆیە ئەو كەسە تاوانى ئەو تاوانكارییە لە ڕۆژى دواییدا هەڵدەگرێت و نە لە سەر ئیسلام و نە لە سەر موسڵمانان دەژمێررێت، ئەو موسوڵمانانەی كە شوێنكەوتەى ڕێنماییەكانى ئایینى ئیسلامى پیرۆزن، و پابەندى فەرمانەكانى قورئانى پیرۆزو سوننەتەكانى پێغەمبەرى خوان (صلى الله عليه وسلم) و دەست گرن بە پەتى
پتەوى خواوەندیانەوە، بەڵكو ئەو كردارانە جگە لە ئاشوب و تاوانكارى هیچى ترنین، و شەریعەتى ئیسلامى پیرۆز و فیترەتى پاكى مرۆڤایەتیش بەچاكى نازانن.
بۆیە ئایەتەكانى قورئانى پیرۆز و سوننەتە (صحيح)ـەكانى پێغەمبەرى خوا صلى الله عليه وسلم قەدەغەى دەكەن و حوكمى حەرامێتى بەسەردا دەدەن، لە گەڵ ئاگاداركردنەوە لە هاوڕێتى ئەو كەسانەى كە بەم تاوانە هەڵدەستن.
بۆ نموونە: خواى پەروەردگار فەرموویەتى: [ وَمِنَ النَّاسِ مَنْ يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ وَهُوَ أَلَدُّ الْخِصَامِ وَإِذَا تَوَلَّى سَعَى فِي الْأَرْضِ لِيُفْسِدَ فِيهَا وَيُهْلِكَ الْحَرْثَ وَالنَّسْلَ وَاللَّهُ لا يُحِبُّ الْفَسَادَ وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْأِثْمِ فَحَسْبُهُ جَهَنَّمُ وَلَبِئْسَ الْمِهَادُ ] (البقرة: 204 - 206)…) (4).
[* برِیارێكی تری (دەستەی گەورە زانایان) (هيئة‌ كبار العلماء):]
هەروەها سەبارەت بە (تەقینەوە) دەستەی گەورە زانایان ئەم بڕیارەی دەركردووە كە تیایدا هاتووە: (دەستەی گەورە زانایان بڕیار دەدات: ئەم دەست درێژی كردنە سەرە كارێكی تاوان كارانە و ستەمێكی خراپە، وە خیانەت و غەدر و دەست درێژى یە بۆ سەر حەرام كراوەكانی ئیسلام لە نەفس و سامان و ئاسایش و دامەزراوێتی، وە هیچ كەسێك بەم كارە (واتە: تەقینەوە) هەڵناسێت تەنها ئەو كەسە نەبێت كە خاوەنی دەروونێكی ستەم كار و پڕ لە ڕق و خیانەت و حەسودی و دەست درێژی كردنە، و ناحەزە بە ژیان و خێر و چاكەكاری، وە هیچ جیاوازیەك نى یە لە نێوان موسوڵماناندا لە سەر حەرامێتی (تەقینەوە)، و ناشیرێنێتی ئەم ستەمە و گەورەیی ئەم تاوانە، وە ئایەت و فەرموودە لە سەر حەرامێتی ئەم ستەم و تاوانە و هاوشێوەكانی زۆر و زانراون...
وە پێویستە لە سەر هەموو ئەو كەسانەی كە شتێك زانیاریان هەیە سەبارەت بەو تێكدەرانە لایەنە تایبەتمەند و بەرپرسەكان ئاگادار بكاتەوە لێیان.
وە خوای گەورە لە قورئاندا ووریا و ئاگاداری كردووینەتەوە لە بانگەوازكارانی خراپە و تێكدەر و گەندەڵ كارانی سەر زەوی و دەفەرموێت: [... وَإِذَا تَوَلَّى سَعَى فِي الْأَرْضِ لِيُفْسِدَ فِيهَا وَيُهْلِكَ الْحَرْثَ وَالنَّسْلَ وَاللَّهُ لا يُحِبُّ الْفَسَادَ...] (5).
[* فەتوای شێخ (الألباني) ـ رِەحمەتی خوای لێبێت ـ سەبارەت بە: خۆ تەقاندنەوە و خۆ كوژی: (الانتحارات)]
شێخ (ئەلبانـی) ـ ڕەحمەتی خوای لێبێت ـ فەرموویەتی: (كردارە (خۆ تەقاندنەوە و خۆ كوژی)یەكان لە ڕۆژگارى ئێستادا، هەمووى ناشەرعى یە و حەرام و قەدەغەكراون، هەندێك جار دەچێتە ڕیزى ئەو تاوانانەى كە خاوەنەكەى بە هەتا هەتایى لە ئاگرى دۆزەغدا بهێڵێتەوە، و هەندێك جاریش دەچێتە ڕیزى ئەو تاوانانەى كە خاوەنەكەى بە هەتا هەتایى لە ئاگرى دۆزەغدا ناهێڵێتەوە...، بۆیە ئەم كردارە خۆكوژیانە بە هیچ شێوەیەك لە ئیسلامدا نى یه.....) (6)
[* فەتوای شێخ (ابن العثيمين) ـ رِەحمەتی خوای لێبێت ـ سەبارەت بە: خۆ تەقاندنەوە و خۆ كوژی: (الانتحارات) ]
پرسیار كراوە لە شێخ ـ ڕەحمەتی خوای لێبێت ـ: (هەندێك دەڵێت: من هەڵدەستم بە كردارێكی جیهادی لە سەر شێوازی خۆتەقاندنەوە!، بۆ نموونە ئەوەی كە هەندێكیان پێی هەڵدەستن: لە مین و لوغم ڕێژ كردنی ئۆتۆبیلەكەی بە تەقەمەنی و ڕۆیشتنە ناو دوژمنەوە،وە دەشزانێت كەوا لەم ڕووداوەدا دەمرێت بە دڵنیایی ؟
ئەویش لە وەڵامى ئەم پرسیارەدا فەرمووی: (بۆچوونی من لەم كارەدا ئەوەیە: كەوا ئەم كەسە كە خۆی دەتەقێنێتەوە بكوژی خۆیەتی، وە سزا دەدرێت لە دۆزەخدا بەو شتەی كە خۆی پێ كوشتووە هەر وەك چۆن لە فەرموودە (صحيح)ەكەی پێغەمبەردا (صلى الله عليه وسلم) هاتووە …
وە من وا دەبینم ئەو كەسە عوزر و بیانوی نى یە لەم سەردەمەدا، چونكە ئەم جۆرە لە خۆ كوژی، بەربڵاوە‌ لە ناو خەڵكدا، وە پێویستە لە سەر مرۆڤــ پرسیار لە زانایان و ئەهلی عیلم بكات، بۆ ئەوەی ڕێگای چاكە و ڕێگای خراپەی بۆ ڕوون ببێتەوە. وە جێگەی سەرسوڕمانە: ئەوانە خۆیان دەكوژن لە كاتێكدا كە خوای گەورە خۆ كوشتنی حەرام و قەدەغە كردووە و دەفەرموێت: [ وَلاَ تَقْتُلُواْ أَنفُسَكُمْ إِنَّ اللّهَ كَانَ بِكُمْ رَحِيمًا] ...) [مـجلة الدعوة، العدد: (1598)] .
هەروەها لە یەكێك لە كتێبە زۆر بە نرخەكانیدا فەرموویەتی: (… بەڵام ئەوەی كە هەندێك لە خەڵك دەیكات لە (خۆتەقاندنەوە / الانتحار) بە شێوەیەك كە كەرەستەی تەقینەوە هەڵدەگرێت لە گەڵ خۆیدا و بەمەوە دەچێتە پێشەوە بۆ ناو كافر و بێ باوەڕان ئەنجا كاتێك دەگاتە ناویان دەیتەقێنێتەوە، ئا ئەمە خۆ كوژى یە پەنا بە خوا، وە هەر كەسێك خۆی بكوژێت ئەوا بە هەتا هەتایی لە ناو ئاگری دۆزەخدا دەمێنێتەوه(7)‌ هەر وەك چۆن لە فەرموودەكەی پێغەمبەردا (عليه الصلاة والسلام) هاتووە… بۆیە من وا دەبینم ئەوەی كە هەندێك لە خەڵك دەیكات لە (خۆتەقاندنەوە / الانتحار) وا دەبینم ئەوە خۆ كوژی و كوشتنی نەفسە بە بێ حەق، وە ئەمە خاوەنەكەی دەخاتە ناو ئاگرەوە پەنا بە خوا، وە خاوەنەكەی (شەهید) نى یە …).
وە فەرموویەتی: (ڕێبازی تەقینەوە و خۆتەقاندنەوە: ڕێباز و ڕێڕەوێكی پیسە.. ڕێباز و ڕێڕەوی خەوارجە...) [شريط / الـحادث العجيب] .
[* فەتوای شێخ (أبو بكر الجزائري) رِەحمەتی خوای لێ بێت ]
ئەم زانا پایە بەرزەش سەبارەت بە (تیرۆر كردن و تەقینەوە) فەرموویەتی: (ئەو تیرۆر و تەقینەوانەی، كە هەندێك لە گەنجە موسوڵمانەكان لە وڵاتى موسڵمانان و دەرەوەشی پێی هەڵدەستن، لە ژێر دروشمی جیهاد و كوشتنی ئەو ستەمكارانەی كەوا حوكم دەكەن بە غەیری ئەو ئاینەی كە خوا دایبەزاندووە، وە لە ژێر دروشمی داواكاری حوكم كردن بە ئیسلام و دامەزراندنی حكومەتێكی ئیسلامی، هەموو ئەم كردەوانە پوچەڵ و بۆگەنن و ڕاست نى یە بدرێنە پاڵ ئیسلام و ئاینەكەی خوا بە هیچ شێوەیەك، وە حەڵاڵ نى یە بۆ هیچ موسوڵمانێك پشتگیری لەم كارانە (واتە: تیرۆر و تەقینەوە) بكات تەنانەت بە ووشەیەك یان درهەمێكیش، چونكە ئەم كارانە تەنها ستەم و خراپە و تێكدان و گەندەڵكاری نەبێت لە سەر زەویدا هیچی تر نین…) [جريدة الـمسلمون العدد: (590)] .
لە كۆتایدا داواكارین لە خوای پەروەردگار ئەو گەندەڵ و گەندەڵكارانە لەناوبەرێت و بن بڕیان بكات، هەروەها داوا لە هەموو مامۆستایانی ئاینی دەكەین كە ئەم ڕاستیانە بۆ خەڵك ڕوون بكەنەوە لە سەر مینبەرەی مزگەوتەكان بۆ ئەوەی چی تر چەمكی بۆچوون و تێگەیشتنەكان تێكەڵ نەكرێن و چی تر ڕەفـتاری گەندەڵ و گەندەڵكاران لە سەر ئاینی پیرۆزی ئیسلام و موسوڵمانان حیساب نەكرێت !
وە پێویستیشە چارەسەری مێشكی حەماسى و تەكفیرى یە خەوارجەكان بكرێت بە ڕوونكردنەوەی ڕاستى یەكان و هەڵوەشاندنەوەی شوبهەكانیان !
------------------------------------------------------------
(1) مجلة الدعوة العدد: (1548)، نقلاً باختصار عن كتاب: (كيف/ نُعالـج واقعنا الأليم) ص: (139 ـ 141).
(2) بڕوانە بڵاوكراوەی: (من التكفیر إلى التفجیر)
(3) وە ئەوەی كە بە هۆیەوە ڕوو دەدات لە ووڵاتە ئیسلامیەكاندا ـ وەك عێراقی ئێستا و جەزائیری پێشوو ـ: یەكێكە لە گەورەترین بەڵگەكان لە سەر ئەم ووتەیە.
(4) نقلاً باختصار عن: مجلة البحوث الإسلامية العدد: (56) ص: (357 ـ 362)
(5) نقلاً باختصار عن كتاب: (كيف نعالـج واقعنا الأليم) ص: (137 ـ 138).
(6) نقلاً عن شريط (فتاوى العلماء فـي الاغتيالات والتفجيرات) وە بڕوانە كتێبی: (الفتاوى الـمهمة فـي تبصير الأمة) ص: (76).
(7) ئەمە حوكمی ئەو كەسەیە كە خۆی لە ناو كافراندا دەتەقێنێتەوە، وەیل بۆ ئەو كەسەی خۆی لە ناو موسڵمانان دەتەقێنێتەوە و موسڵمانانی بێ تاوان دەكوژێت.

www.ba8.org

بینێرە بۆ هاوڕێکەت
چاپکردن
ستایڵ
  • قەبارەی فۆنت
    • گەورەکردن:
    • zoomin
    • بچوک کردنەوە:
    • zoomout
  • جۆری فۆنت
    • ههەڵبژاردن:
  • ڕەنگی فۆنت
    • هەڵبژاردن:
  • بنەڕەتی کردنەوە
    • بنەرەتی
ڕێکلام